السبت، 19 أكتوبر 2019

صحراء تضيع فيها أجمل معانى الحياة

اتعلم شعور من يسير وسط صحراء جرداء يبحث عن من يروى عطشه، يسير اميال طويلة بحثاً عن ظل شجرة، كي يستريح قليلاَ ليستكمل مسيرته التي خُلق من أجلها، كي ينفذ رسالته على اكمل وجه ليذهب بعدها إلى ربه تاركاً باقي المسيرة لغيره، اتعلم كم الصعوبات التي يواجها؟؟ وماذا ستقول عند معرفتك انه وضع دام سنوات ومازال؟؟ 

كان شاب يحلم بأحلام وردية، لم يعرف معنى الكره والظلم والخوف وعدم الأمان، كان وجهه مشرق، مُقبل على الحياة، عيناه تلمع دائماً من البهجة،  لم يعرف غير أن الحياة رائعة ستعطيه الراحة  وستحقق أحلامه، واستمر في حلمه حتى بدأ مرحلة العشرينات، وبدأ مرحلة جديدة ومختلفة عما كان يحلم بها ...

بدأ يصطدم بمعوقات في حياته، ولم تكتفى الحياة بذلك، بل استيقظ فاجأه بدون مقدمات بمعاني آخري غير التي عرفها، فعرف منذ ذلك الحين معنى الخوف، معنى الظلم، بدأ يرى الناس على حقيقتها، وكانت بداية النهاية... 

بداية نهاية ضحكته ولمعان عينه وبهجته واشراق وجهه، بدأ المعافرة والتحدي والمغامرة، بدأ يعيش بروح شخص آخر، بذل الكثير والكثير كي يتأقلم عما حوله وكلما استطاع ذلك كلما اصطدم بموقف اصعب وحياة اصعب وظروف اصعب، يقع ويتحمل ويصمد ولن يسمح للزمن بكسره، يعافر ويقف مرة آخري على قدميه، يكافح ويجاهد نفسه ليعود أقوى مما سبق، يجرى في طريق لم يرى بدايته من نهايته، وعند ظهور نهايته يظهر له طريق آخر يجب أن يسير لنهايته، بشكل إجباري وليس اختياري.... 

صمد مرات لم تخطر على بال احد، مر بتجارب قاسية، مر بظروف مختلفة وصعبة، تحمل المسئولية قبل أوانه، عاش حياة لم يخطط لها، أُجبر على ظروف لم يختارها، وكان أقوى منها، وتمكن من النجاح، وبدأت الحياة تبتسم له، ولكن لم يدم ذلك طويلأ، وكالعادة عاد الظلام، عاد الخوف، عادت الحياة بصعوباتها، ولكن بقسوة أكبر، فأرجله لم تعد تتحمل الجرى والشقى، عقله لم يعد قادرأ على التفكير، عيناه لم تعد قادرة على البكاء حتى تخفف عنه جزء من همومه، لم يستطع وظل يجرى فى صحراء كبيرة، بمفرده، وأصبحت لديه أمنية واحدة فقط أن يعطيه الله هدنة، هدنة كي يستريح، هدنة كي يتمكن من مواجهة المشقة في حياته، هدنة من الصدمات، هدنة من التوتر، من الخوف، من التعب، من المشقة... 

ورغم كل ذلك فهو راض بقضاء الله، راض بضياع أجمل أيام عمره فى ظروف ليست بيده، ولم يحلم يوماً مثل باقى الشباب، لم يحلم بالسفر والتنزه وامتلاكه للأموال وغيره، ولكن يحلم بالهدوء فى حياته وشخص يتحمل مسئوليته، يحلم فقط بنومة هادئة بدون أحلام مزعجة، بدون الأحلام التى تراوده كل ليلة،  يحلم بهدنة طويلة إلى حد ما ليستريح فيها، وذلك أقصى طموحه ....


الجمعة، 11 أكتوبر 2019

الوعد...

زمان ممكن من عشر سنين كدة كنت بسمع دايما "لما تكبرى وتمرى بكل خبراتنا هتعرفى يعنى ايه اللى بنقوله دا، او هتعرفى معناه، او بسمع اصلنا عندنا خبرة اكتر منك من كتر اللى شوفناه"
لما كنت بسمع كل دا مكنتش بتخيل يعنى ايه الدنيا هتعلمنى دروس عمرى ما هنساها وهتعرفنى حاجات عمر الكلام وحده هيكون كافى، لكن بتجربة الموقف نفسه هو الأهم.
كل سنة كانت بتمر عليا كنت بتعلم دروس كتيرة، بس اكتر درس اتعلمته وفهمته قوى انى موعدش حد بحاجة ابدا، عشان اتعلمت ان في ظروف هتكون اقوى منى، ووقتها هبقى بين حيرة كبيرة قوى انى ازاى انفذ وعدى وازاى اتغاضى واعدى الظروف اللى مليش يد فيها، ومش بس كدة اتعلمت كمان مطلبش وعد من حد في حاجة، عشان نفس السبب، اتعلمت انى اعمل اللى عليا بس بدون وعد، ان قدرت احقق للشخص اللى قدامى اللى بيتمناه فتمام قوى، مقدرتش يبقى ضميرى مرتاح بنسبة كبيرة انى عملت اقصى ما عندى بس الظروف اللى منعتنى.
اتعلمت دا عشان جربت يعنى ايه أدى وعد ومقدرش انفذه، اتعلمت تأنيب الضمير اللى ممكن أعيش بيه، اتعلمت ان الوعد يا يطلع سابع سما يا عدم تحقيقه ينزل سابع ارض، اتعلمت يعنى ايه كسرة وخيبة الامل.
اتعلمت ان الوعد دا حاجة كبيرة قوى قوى، وفهمت جملة "وعد الحر دين عليه" فهمت قد ايه الوعد دا بيدى حياة تانية، بيعيش الواحد في حلم كبير، وفاجاة لما يصحى منه بينهار، ويمكن بيتغير ويبقى شخص تانى خالص.

الوعد مش سهل طالما الأمر اللى بتوعد حد بيه مش بايدك لوحدك، وطول ما انت مش صاحب قرار نفسك لوحدك يبقى متوعدش حد، لكن اسعى واعمل اقصى ما عندك عشان تساعده وتحققله اللى يتمناه بس بدون وعد، هتفرق قوووووى....

اهم انجازاتى

رابط رسالتى للدكتوراة
"تنشيط المبيعات الإلكترونى وعلاقته بالسلوك الشرائى للجمهور المصرى"

https://drive.google.com/file/d/1nOX5f895ML8LDUxmmnJujiMFrY6MYi4_/view

رابط رسالتى للماجستير
"دور التسويق الإلكترونى فى الترويج لشركات السياحة" 

https://drive.google.com/file/d/0B6QP1ikYP5F8YUVLS2o3Y3FBQTg/view

الأحد، 6 أكتوبر 2019

حكمة

ساعات اشخاص بتدخل حياتك يمكن بس عشان يدوك حكم وينبهوك لاى غلط 
اكتر حكمة اتعلمتها من شخص انه كان دايما يقولى اوعى تحسى انك مظلومة لانك ساعتها هتظلمى وهتبقى ظالمة....
مكنتش بقدر استوعب المعنى قوى الا لما فعلا اتظلمت كتير وبدات احس انى بتغير مع اقرب الناس ليا وانى هبدأ اظلمهم جدا،  ....ساعتها فهمت المعنى وفهمت ازاى انه لازم الواحد يتحكم قوى في نفسه وقت الغضب

السبت، 5 أكتوبر 2019

دردشة عل ماشى

* لما تعجز عن اسعاد نفسك، دور على السعادة فى اللى حواليك، شوف حد عنده مشكلة وساعده، او حد مهموم وهون عليه، ولما هتشوف السعادة فى عيونهم هتقدر تسعد نفسك.

* مش هقولك ازعل لما حد يضايقك او ميقفش جمبك، ومش هقولك متزعلش وكبر واعمل بارد، بس هقولك انك تحاول تعتمد دايما على نفسك ومتطلبش حاجة من حد، وعادى جدا الله اعلم بظروفه ايه، او مدى مقدرته ايه فى حل مشاكلك.

* لما تتمنى حاجة قوى، ومتتحققش بسبب تدخل شخص او مشاكل حصلت، متزعلش وتاكد ان حتى لو الشخص دا غلطان فخلاص هى ارادة ربنا ان الحاجة دى متحصلش، لان لا انس ولا جن بيقدروا يقفوا قصاد تنفيذ ارادة الله، كلنا اسباب فى الدنيا ممكن نكون سبب للخير وممكن نكون سبب للشر، بس فى النهاية تاكد يكون ما ربنا هيامر هيحصل اللى بتتمناه.

* زمان كنت بقول لما تزعل قوى وتغضب خرج نفسك واشغلها عشان تنسى، يمكن لسة عند رايى بس زودت عليه انك لازم تعيش جزء من يومك فى حالتك الطبيعية اللى هى حالة الحزن، عشان تاخد وقتها اى كانت ايه سنة او اتنين او اكتر، بس فى يوم الحزن هيقل وهتنسى، ودايما الحزن بيبدأ كبير وبيصغر، ويمكن متنساش بس عل اقل هتتأقلم وتتعود، لكن الهروب دايما هتيجى فى مرحلة وتنهار، لازم فترة الحزن تتعاش بكل قساوتها وآلامها، الهروب منها هو عبارة عن تخدير مؤقت، فاجآة هتفوق منه وساعتها هيبقى الحزن مضاعف والخروج منه هيكون صعب قوى.

* ملوش اى لزمة حد يغير من حد ولا يبص على اللى فى ايد غيره ولا يوقع بين حد، عشان فى النهاية محدش هياخد غير نصيبه، الفكرة بس انك تقرر انك تكون سبب للخير فى الدنيا، بدل ما تكون سبب للشر ويتربى جواك الحقد والكره. 

* لما حد يأذيك ويضرك، اعرف ان هو اللى بيضر نفسه، لان كدة كدة كان ربنا هيكتبلك الضرر دا، بس بسبب غباؤه والحقد اللى جواه قرر انه يكون سبب للشر، وربنا خلاه يضرك عشان يجى اليوم ويردله دا وياذيه اضعاف ما هو اذاك، يعنى من الاخر هو اللى يصعب عليك مش انت. 

* اتعلم تحط خطط بديلة لكل حاجة، عشان لو حاجة محصلتش يبقى عندك البديل ومتقفش ومتتكسرش وتنهار، توقع ان الوحس ممكن يحصل، مش معناه تشاؤم بس اسمها واقعية، عيش وقت الفرحة بتفاؤل وسعادة بس توقع الأسوأ علشان متقعش فاجاة لما الفرحة تروح والسعادة تختفى.

* اتعلم توقف نفسك بنفسك، متسمحش للدنيا ولا لحد انه يكسرك، اتعلم تبقى قوى، علشان مهمتنا فى الدنيا نستمر ونتعب ونشقى، مينفعش نقع ولا نقف.

* افصل دايما كل حاجة عن التانية، وادى كل حاجة حقها، افصل شغلك عن حياتك الشخصية، ومهما كان فيك متهملش شغلك او العكس.

* متخليش قساوة الدنيا والبشر وصعوبات الحياة تضيع الحاجات الحلوة اللى جواك.

* اتعود تعمل كل خير لكل الناس عشان ربنا وبس، متستناش حد يقف جمبك زى ما بتقف جمبه، ولا حد يساعدك زي مساعدتك من كل قلبك ليه، ولا حد يحبلك الخير زى ما بتتمنى للكل، متستناش رد فعل، استنى ربنا يجازيك خير وييسرلك امورك ويديك ثواب فى الاخرة.

* لما حاجة صعبة تقف قصاد وتتعقد، دور على حد فى ازمة وساعده، هتلاقى ربنا هيسخر اللى يساعدك ويقف جمبك.

* طول ما انت عايش وبتتنفس مضيعش يوم فى ولا حاجة، عل اقل لو مش قادر تشتغل يبقى تحاول تسعد نفسك، وتحبها علشان انت الوحيد اللى فاهمها وتقدر تبسطها، وساعتها مش هتستنى حد يسعدك ولا هدور عليه.



* حب الناس، حب الخير ليهم، اتمنى السعادة للكل.............


الأربعاء، 2 أكتوبر 2019

ضحكة ماتت، وعيون انطفت، وقلب اتكسر

بنسأل نفسنا ساعات ليه فلان اتغير معايا؟ ليه مبقاش بيضحك، دا بقا دمه تقيل قوى..!!


ليه فلان مبقاش بيحب يتكلم معانا؟


أو نستغرب قوى من تصرفات شخص معين فى موقف معين ونقعد من وراه نتكلم ونلومه ونعاتبه؟


وغيره من اسئلة ومواقف يومية بتعدى علينا بنسأل نفسنا كذا سؤال؟ ومش بنحاول نفكر ايه اللى ممكن يكون الشخص دا مر بيه وصله للمرحلة دى.....


* اعذر واحد بطل يضحك، هو بيحبك بس مبقاش قادر يضحك علشان مات من جواه ميت مرة من ناس كتيرة قوى، هو مش زعلان منك قد ما اتكسر وماتت ضحكته.


* اعذر واحد بطل ياخد رايك فى اموره، هو مبطلش يثق فيك، بس مبقاش قادر حتى يتكلم ويحكى فى مشاكله، هو وصل لمرحلة انه حابب يسكت ويكلم ربنا وبس، اصل الكلام بقا بيوجعه قوى، لكن ربنا هيسمعه بدون ما يتكلم.


* اعذر واحد اتحول لشخص شكاك بعد ما كان طبيعى جدا، اصل ضهره اتقطم من كتر ما خاب ظنه فى حاجات كتير فمبقاش بيثق في ان حاجة حلوة هتحصله، فطبيعى يوصل انه يشك فى كل حاجة.


* اعذر واحد بقا كلامه على قد الموقف، اصل همومه واصلة معاه للحد اللى محدش يقدر يفهمه ويتخيله، وطاقته خلصت، فمبقاش في كلام كتير يقدر يقوله زيادة.


* اعذر واحد مبقاش قادر يواسيك، اصل مشكلته اكبر من شاكلك بكتير قوى، ومش مستصغر مشكلتك، بس تعبان قوى من جواه وكل كلامه هيكون نكد قوى، فقرر يقولك ربنا معاك ويسكت، هو حاسس بيك قوى، بس اللى هو فيه اكبر من انه يقدر يقول كلمة تفاؤل تهديك.


* اعذر واحد مبقاش قادر يطمن عليك ويشاركك افراحك، اصله بقا عارف ان دمه هيكون تقيل قوى ومش هيقدر يبسطك، بس هو بيتمنالك الفرح من كل قلبه، لكن حضوره هيتعبه قوى لانه هيضطر يمثل الفرحة، والتمثيل هيرهقه قوى، ففضل انه يبعد.


* اعذر واحد بيقولك سبنى لوحدى فترة، اصل خلقه خلص، طاقته انتهت، صبره انعدم، محتاج يحاول يلم اللى باقى منه، بيحاول يعيش اللى باقى من عمره فى سلام وبعيد عن كل المشاكل.


* اعذر واحد كلامه كله بقا نكد، هو اكيد مكنش كدة، بس الحياة جت عليه بزيادة قوى، اتحمل مسئوليات فوق طاقته لحد لما انفجر، لحد ما مبقاش عارف يطلع النفس منه، بقا بيلاقى صعوبة فى خروج ودخول النفس منه.


* اعذر واحد بقا عصبى وخلقه ضيق، اصله تعب قوى عشان حاجات حلوة كتيرة تحصل ومحصلتش فى الاخر، تعب ماديا وصحيا ونفسيا، ضحى بحاجات كتيرة عشان يحقق حلمه، لكن حلمه ضاع فى غمضة عين.


* اعذر واحد انت غلطت فى حقه كتير، وسامحك كتير، بس جت المرة اللى مقدرش خلاص يسامح ويعدى، واعرف ان غلطك المرة دى مش هيتصلح، وانك خسرته خلاص، وحافظ على اللى حواليك ومتكررش معاهم دا تانى.


* اعذر واحد قلبه جمد معاك ومع غيرك، اصلك وصلته لكدة من جمودك معاه، من انك مبقتش قادر تفهمه، ولما احتاجك مكنتش جمبه، ولقى نفسه لوحده، ومش بس كدة، هو كان دايما لوحده وانت بعيد، وكنت بتقوله هتلاقينى جمبك بس مكنش دا بيحصل.


* اعذر واحد بقا بيفكر فى نفسه وبس، اصل كله اتخلى عنه فى اوقات ضعفه وكسرته واحتياجه، فقرر ميعتمدش على حد ولا يفكر في حد.


* اعذر ضحكة ماتت، وعيون انطفت، وقلب اتكسر...... عشان ساعتها هيكون صاحب الصفات دى شخص تانى غير اللى عرفته .......


*********** اعذار لازم نديها لكل شخص حوالينا، كل واحد فيه اللى مكفيه، كل واحد ليه حياة محدش يعرف تفاصيل كتيرة عنها، بس تأكد انها تفاصيل توجع قوى لو عرفتها، محدش بيتغير بالساهل، محدش بيتحول لشخص تانى الا من كتير قوى، اعرف ان دايما فى القشة التى كسرت ضهر البعير، اعرف ان لكل واحد طاقة هتيجى يوم وتخلص، ولما تخلص اديله اعذار عشان هيكون ليه ميت مبرر على اللى وصله..... احذر انك تكون سبب فى انك توصل لشخص لاى حاجة من الحاجات دى، لانك هتندم بعدها لما تخسره.

صحراء تضيع فيها أجمل معانى الحياة

اتعلم شعور من يسير وسط صحراء جرداء يبحث عن من يروى عطشه، يسير اميال طويلة بحثاً عن ظل شجرة، كي يستريح قليلاَ ليستكمل مسيرته التي خُلق من أ...