زمان ممكن من عشر سنين كدة كنت بسمع دايما "لما تكبرى وتمرى بكل خبراتنا هتعرفى يعنى ايه اللى بنقوله دا، او هتعرفى معناه، او بسمع اصلنا عندنا خبرة اكتر منك من كتر اللى شوفناه"
لما كنت بسمع كل دا مكنتش بتخيل يعنى ايه الدنيا هتعلمنى دروس عمرى ما هنساها وهتعرفنى حاجات عمر الكلام وحده هيكون كافى، لكن بتجربة الموقف نفسه هو الأهم.
كل سنة كانت بتمر عليا كنت بتعلم دروس كتيرة، بس اكتر درس اتعلمته وفهمته قوى انى موعدش حد بحاجة ابدا، عشان اتعلمت ان في ظروف هتكون اقوى منى، ووقتها هبقى بين حيرة كبيرة قوى انى ازاى انفذ وعدى وازاى اتغاضى واعدى الظروف اللى مليش يد فيها، ومش بس كدة اتعلمت كمان مطلبش وعد من حد في حاجة، عشان نفس السبب، اتعلمت انى اعمل اللى عليا بس بدون وعد، ان قدرت احقق للشخص اللى قدامى اللى بيتمناه فتمام قوى، مقدرتش يبقى ضميرى مرتاح بنسبة كبيرة انى عملت اقصى ما عندى بس الظروف اللى منعتنى.
اتعلمت دا عشان جربت يعنى ايه أدى وعد ومقدرش انفذه، اتعلمت تأنيب الضمير اللى ممكن أعيش بيه، اتعلمت ان الوعد يا يطلع سابع سما يا عدم تحقيقه ينزل سابع ارض، اتعلمت يعنى ايه كسرة وخيبة الامل.
اتعلمت ان الوعد دا حاجة كبيرة قوى قوى، وفهمت جملة "وعد الحر دين عليه" فهمت قد ايه الوعد دا بيدى حياة تانية، بيعيش الواحد في حلم كبير، وفاجاة لما يصحى منه بينهار، ويمكن بيتغير ويبقى شخص تانى خالص.
الوعد مش سهل طالما الأمر اللى بتوعد حد بيه مش بايدك لوحدك، وطول ما انت مش صاحب قرار نفسك لوحدك يبقى متوعدش حد، لكن اسعى واعمل اقصى ما عندك عشان تساعده وتحققله اللى يتمناه بس بدون وعد، هتفرق قوووووى....
