الأحد، 1 فبراير، 2009

مناقشة ساخنة

مناقشة ساخنة
..........................
سؤال ببدا بيه
هل حد شايف ان مصر ممكن تتغير وترجع تانى مصر بتاعت زمان ، مصر اللى كانت اكبر من امريكا واقوى منها فى فترة من الفترات ، مصر اللى كان اى مصرى فيها مستعد بجد يضحى بروحه وبولاده عشانها ؟؟؟؟

اكيد بنسبة 99 % هتكون الاجابة ( لا )

طب ليه منخليش الاجابة ( أه ) حتى لو انها ممكن تتغير بنسبة 1 % ليه منحاولش نفكر ازاى نغيرها
احنا كشباب وكرجالة نبدا نفكر كل واحد فينا ممكن يعمل ايه
مصر جميلة والشعب المصرى اذكى الشعوب بس مش عارفين نستغل دماغنا صح
وكمان بنستغل بعض وبننصب على بعض وكل واحد مش همه الا نفسه وبس محدش بيحاول يعمل حاجة ولو فى ايده حاجة يعملها يقول يعنى هى جت عليا هو انا يعنى اللى هغير الكون ويبعد ايده عن كل حاجة
هو دا اللى احنا بنعمله دلوقتى
مصر مش بس فيها فساد من الحكومة
الفساد جاى مننا احنا كشعب مصرى
وعشان كدة مصر خربانة ، طب دلوقتى مش فى ايدينا اننا نغير الحكومة بتاعتنا بس فى ايدينا نغير نفسنا ولما نغير نفسنا هنغير حاجات كتير حوالينا وساعتها نقدر نقول ان مصر اتغيرت بنسبة معينة
واكيد عبال ما الكلام دا يحصل هيكون مر وقت طويل حتى لو ايه المشكلة ايه يعنى بس المهم اننا فعلا نعمل حاجة
لو قلنا مثال عن التعليم دلوقتى احنا قدام امر واقع التعليم ولا ليه اى فايدة هو مجرد بيوسع مداركنا فقط لا غير طب نقوم بقى نقول مه التعليم خربان ونزود الموضوع اللى فى ايدنا نعمله لو اى مدرس او مدرسة المفروض انهم يبقى عندهم ضمير فى الشرح ومش شرح المنهج الدراسى بس المفروض يزودوا معلومات من عندهم للطلاب والطلاب عليهم انهم مش يكتفوا بالمذاكرة وبس المفوض يقراوا كدة ممكن نعمل على تنشيط حركة التعليم فنبقى حلينا مشكلة بتواجهنا ،
مثال تانى الدكاترة دلوقتى الدكاترة اغلبهم نصابين جدا حد يروح يكشف عن دكتور اسنان يلاقى نفسه دافع اما 200 جنيه او 500 دا فى المرة الواحدة او مرتين مثلا
طب ليه هل المعدات اللى بيستخدمها الدكتور تستاهل المبالغ دى هل هو بيتعب عشان المريض يدفع المبالغ دى ومش بس دكتور الاسنان دا كل الدكاترة كدة اى كشف بيبقى عالى قوى دا غير الادوية غير المتابعة طب ليه كدة ايه ذنب المريض فى كدة ، فاكيد الدكتور مبيتكلفش حاجة للدرجة دى فممكن الدكاترة يحاولوا يقللوا تمن الكشف و تمن المتابعة واللى مش قادر يدفع عادى مش لازم ياخدوا فلوس بس ساعتها يبقى هو عارف فعلا ان الحالة دى مش هتقدر تدفع ودا بيبقى عن طريق بحث حالة بيتعمل ، لكن المشكلة ان كل دكتور بيبقى حابب انه يبقى غنى وبدل ما يكسب مثلا الف جنيه فى الشهر يكسب الفين وهكذا وبتهيالى دى مشكلة ممكن تتحل

مثال تالت محلات الملابس او السوبرماركت او ...او ...... فى كتير منهم بينصبوا فى الاسعار وبيعلوا السعر والدليل على كدة انك مثلا تروح محل ملابس تلاقى سعر عالى قوى لى حاجة تعجبك ونفس الحاجة دى ممكن تلاقيها فى مكان تانى نفس الخامة بس بسعر اقل بكتير قوى فهنا نلاقى ان المحلات دى بترفع السعر قوى عشان تكسب اكتر من اللى المفروض تكسبه اضعاف اضعاف
طب ليه كدة ليه تنصب على الناس

مثال رابع عشان تروح تقضى اى يوم فى اى مكان بتدفع مبلغ عالى قوى قوى واصلا بيبقى المكان دا مش محتاج المبلغ الى بتدفعه دا بس اصحاب المكان بيستغلوا الناس مثلا اى حد يروح يصيف فى اى مكان شوف بتدفع قد ايه عشان تدخل البحر وبتدفع قد ايه لو طلبت حاجة تشربها ولو رحت تفسح طفلك فى اى مكان شوف بتدفع قد ايه فى حين ان الاماكن دى اصلا المفروض متبقاش مكلفة بس اصحابها بيحبوا يستغلوا الناس

مثال خامس عشان تقضى اى مصلحة فى اى مكان لازم تدفع حاجة للعمال او الموظفين عشان يسهلولك الموضوع بتاعك طب ليه كدة ليه كلنا بنستغل بعض كدة ليه الموظف دا ياخد فلوس من الشخص دا واصلا دى وظيفته انه يساعد الناس مش ياخد فلوس منهم

مثال خامس مثلا عربيتك عطلت تروح تصلحها تلاقى نفسك دافع مبلغ عالى قوى قوى والميكانيكى يطلعك عيوب قد كدة فيها وبعد شوية تعطل تانى وهكذا مع ان اصلا العربية بتبقى مش بايظة للدرجة دى وبتبقى فيها حاجة بسيطة قوى اللى بايظة فدا نصب طبعا

وهكذا مهما قلنا امثلة مش هنعرف نقول ايه ولا ايه بس الفكرة ان فعلا الكل بينصب على كله واحان اللى نقدر نمنع النصب دا بداية من التاجر اللى بيعلى السعر لاصحاب المحلات اللى لازم يعلوا السعر للزباين عشان يكسبوا وفى الاخر اصلا بنلاقى التاجر دا كسبان اكتر من حقه اضعاف اضعاف طب ليه يعلى السعر على اصحاب المحلات وهكذا

فدلوقتى نفسى بجد الموضوع دا يبقى مناقشة بنا عايزة اعرف رايكم فى الموضوع دا عايزاكم تقولولى ايه اللى ممكن تعملوه كطلاب وكموظفين
ازاى نحاول نمنع النصب دا ونقلله

هناك 55 تعليقًا:

elsha3er يقول...

اسعدنى ان اكون اول تعليق

على فكرة ان كنت حجاوب ب اة

طبعا مصر ممكن تتغير وترجع تانى مصر بس مش حقول الحكومة تتغير احنا نتغير زى ما انتى وضحتى

العيب فينا

ولكن لا حياة لمن تنادى

اهنيكى على هذا الموضوع


احمد الشاعر

ندا منير يقول...

الشاعر
.........
طب جميل قوى ان اول تعليق يكون اجابته اه

ومبسوطة جدا جدا بانك موافق على كلامى
بس ياريت لو تقولنا ازاى نقدر نعمل دا
بس بخطوات بجد نفسنا نغير ونعمل حاجة

نورتنى

elsha3er يقول...

لو عايزة خطوات يبقى كل واحد يصلح نفسه دينيا دى اول خطوة

لان الدين ما بيتجزأش والناس اللى اتقدمت دى اتقدمت لانها بتحارب وتتقدم
لايمانهم بعقيدتهم

من هنا والله حيبدأ التغير الكلى من حكومة ونظام سياسى واقتصادى

ونقدر نرجع مصر بتاعت زمان

تحياتى


احمد الشاعر

ندا منير يقول...

الشاعر
........
بحييك بجد
واتمنى ان دا يحصل
وطبعا الدين عامل اساسى فى لك حاجة

اشكرك على تعليقك

MISS\GH يقول...

ندا حقيقى انا معجبه بيكى جدا وباصرارك وتحدياتك وقوه شخصيتك
بحييكى بجد على البوست الاكثر ن رائع انتى اتكلمتى عن كل حاجه وعندك حق بجد وانا كمثل الشاعر هقولك اه ينفع ...بس فى حاله اننا نرجع الحب الى كان موجود زمان ونرجع الصداقه الى بجد ونرجع الخوف والامن والاهم من كل ده التعاون فى حب مصر صدقينى هنرجع اقوى الشعوب ايوه هنرجع لو صلحنا من نفوسنا ورجعنا لربنا علشان ربنا قال فى كتابه (قوم نسوا الله فانساهم انفسهم)نسينا ربنا فنسانا وبينتقم مننا ولسه ياما هنشوف دلوقتى مظاهر كتير بنعانى منها فى حياتنا ومابين الشباب والبنات وبنقلد الغرب ملناش مبادىء مع اننا احسن من كل الشعوب وربنا ادانا نعم كتير
بعتذر للاطاله وحقيقى موضوعك مشوق ان الانسان يتكلم فيه ويعبر عن كل الحاجات الى بتدور فى دماغه واتمنى بجد اننا نبتدى ولوحتى هنغيرها بنسبه 1%

romansy يقول...

حمد الله على سلامتك يا ندا عامله ايه فى الدراسه
الموضوع كبير قوى يا ندا
المفروض على كل انسان انه يقاوم النصب دا
وكمان ياريت الضمير يبقى موجود
مكنش دا حالنا

fluent يقول...

هقوءلك اه ،، مصر نقدر نغيرها بايدينا .

ولكن نبدأ بأنفسنا الاول .

كل واحد يبدأ بنفسه ،، ويكون شجره ليها فروع كثيفة .ثم ستأتي الشجرة بثمار ،، نستفيد منها ،،

ونأخذ البذور في زرع اشجار اخري ....وهكذا .

الازهرى يقول...

اتفق مع 1% واقول ممكن جدا

اما عن الخطوات فهى بتبدأ من اننا نتلافى عيوبنا واولها الاعتراف بالخطأ
وبعد كده نصلح الاخطاء

والاخطاء كتير سواء على المستوى العقائدى او التربوى او خلافه
ولو زرتى مدونة الفارس الاخير عندى تلاقى بعضها
يا ريت تقرأيها وتقولى لى رأيك

semsem يقول...

صباح الخير يا ندى وحمدالله عالسلامة
عاملة ايه
يارب تكوني بخير
بخصوص رأيي
انا شايف ان لو كل انسان خلى عنده شوية ضمير بجد الدنيا بتاعتنا دي هتبقى دنيا تانية خالص
مش بس مصر
الدنيا كلها
اللي انا شايفه ان محدش بقى عنده ضمير وكل واحد بيفكر فى نفسه
على العموم ربنا يصلح حال مصر وحالنا وحال المسلمين جميعا
وتحياتي ليكي ولموضوعك
سمسم

ندا منير يقول...

miss/gh
.............
بجد مش عارفة اقولك ايه على كلامك الجميل دا
ميرسى ليكى قوى
وعلى تعليقك

ومفيش اطالة اطلاقا بالعكس رايك عاجبنى قوى
واتمنى انه يحصل

ندا منير يقول...

romansy
.............
ميرسى ليك قوى
وانا الحمدلله تمام
واشكرك على تعليقك
واكيد طبعا وجود ضمير وعدم النصب شئ مهم جدا

ندا منير يقول...

flunt
.......
اكيد طبعا لو كل واحد بدا بنفسه حاجات كتيرة قوى هتتغير

اشكرك على تعليقك

ندا منير يقول...

الازهرى
.........
انا معاك طبعا فى كلامك
واشكرك على تعليقك
وباذن الله هقرا موضوعك

ندا منير يقول...

semsem
..........
مظبوط جدا كلامك
وزى ما قلت ان الضمير شئ مهم جدا وللاسف فهو انعدم من اغلب الناس

ميرسى على تعليقك

كيــــــــــــارا يقول...

ندا حبيبتي

ايه يابنتي البوستات دي مش بتظهر في الريدر خاااااااااااالص

وبحدين انتي مش تعرفي ان ضي القمر اتعملها هاك من شهر 11 اللي فات

كيــــــــــــارا يقول...

هقرا وارجع

كيــــــــــــارا يقول...

نونا

مصر هتتغير

والا كنا لسه في زمن الفراعنه

انظري خلفك وانظري للمستقبل والحاضر هتعرفي ان مش فيه شي ثابت الا الدين

هتتغير ان شاء الله المهم نتكاتف عشان تتغيير

محمد يقول...

آنا ما بفهم اللهجة المصریة. لیش؟

mohamed ghalia يقول...

أنا بصراحة مقتنع تماما بالتغيير
والى هيكون بينا إحنا الشباب
دمتى بكل الود

L0vElYGh0sT14 يقول...

لن نسمو سوا بنقاء الروح وصفاء الفكر وطهارة الجسد
تحياتي لكي بالعطور الفرنسية

احمد على نصار يقول...

ايه التيولك الجديد يا ندى
ثانيا : تالقتى فى الموضوع ده
سؤال فيما معناه بيقول : ازاى تحب مصر ........
والجواب
اننا يكون عندنا ضمير
الجواب فى الضمير يا ندى
طول مافى ضمير الناس حاتكون اقضل
تحياتى

ehab يقول...

السلام عليكم ورحمة اللله وبركاتة

انا طبعا نفسى مصر ترجع لايام زمان بس انا شايف ان الشعب وصل للمرحلة اللى هوه فيها بسبب النظام السيى

وبالنسبة للمحلات انا كنت عاوز اقول ان المحلات بترفع سعر البضاعة اللى عندها بسبب ان المنطقه اللى هيه فيها غالية اصلا يعنى هوه صاحب المحل بيدفع ايجار عالى جدا فلازم يعوض اللى هوه دفعه علشان كده بيغلى البضاعه وانا شايف اننا علشان نكون فعلا ناس تستاهل تعيش فى البلد دى لازم نضحى علشانها ونعمل كل اللى نقدر عليه تجاهها وشايف اننا لازم نبدأ بنفسنا (لا يغير الله قومآ حتى يغيروا ما بانفسهم) ---فى مقوله ما معناها(اذا اردت ان تغير ما حولك فابدأ بنفسك )---
وشكرآ

ehab يقول...

انا نسيت اضيف حاجة --
احنا ممكن نبدأ اولى الخطوات على طريق التقدم عن طريق :-

1-كل اللى عنده فكره جديده ممكن يدخل بيها مسابقة والمسابقة دى اسمها (nobel prize simulation)
بس دى نوبيل المصرية والله هما هيوجهوك هناك صح وازاى تسوق الفكره وتعملها براءة اختراع وانته كده هتنفع مصر.


2-فى حاجة اسمها اكاديمية الهدف دى برئاسة المهندس حسام الحدينى ودى بردوا هادفة الى تطوير مصر .


ياريت نشوف وهمه بيعملوا ايه ونحاول نساعدهم من اجل بلدكم الغالية.

2-

ندا منير يقول...

كيارا
...........
وانتى وحشتينى اكتر

لا معرفش انها اتشالت هبقى اضيف اللينك الجديد

وكويس قوى انك موافقانى على رايى
ويارب فعلا تتغير

نورتى

ندا منير يقول...

محمد
.........

هو انت مش ممصرى ولا ايه

بس انا دخلت على مدونتك لقيتك كاتب كلام مصرى عادى
ايه الفرق
عموما
واحدة واحدة هتتعود على اللهجة
وكنت اتمنى اعرف رايك

ندا منير يقول...

mohamed ghalia
.....................
نورتنى
وطبعا التغير هيبدا بينا احنا الشباب

اشكرك على تعلقك

ندا منير يقول...

L0vElYGh0sT14
..................

اشكرك على تعلقك

واكيد التغير مش هيبقى بنسبة كبيرة بس ممكن يكون فى تغير

ندا منير يقول...

احمد على نصار
.................
اشكرك جدا على تعلقك

واتفق معاك فى كلامك
والضمير فعلا بيلعب دور كبير جدا فى كل حاجة فى مصر

ندا منير يقول...

ehab
........
انا معاك فى اريك ومش هعارضك
بس برده يا ايهاب فى ناس بتعلى اسعار الملابس حتى لو كان ايجار المحل بتاعهم رخيص قوى
هو عموما الشعب المصرى كله كدة
بيحب يستغل الظروف اسوا استغلال

واشكرك على تعليقك

وعلى النصيحة اللى قلتها
وطهى شئ جميل جدا

Amgad يقول...

مممممممممممممممم
كلام جميل وكلام معقول مقدرش اقول حاجه عنه
الكلام سهل اوي يا ندا بس علي مين
داحنا مصر يا رأفت اقصد ياندا
الا قوليلي صحيح
احنا كنا اقوي من امريكا امتي

Abd-Alrahman يقول...

صر هتتغير
واكيد هتتغير
في يوم من الايام

مفيش حاجة بتفضل علي حالها
دوام الحال من المحال

بس المهم يا ندي التغيير يكون للافضل
مش للاوحش زي ما احنا شايفين


تحياتي علي التدوينة الجميلة
وشكرا علي زيارتك


الصيدلي المطحون

Zanooba (Zeinab sab9n) يقول...

أهلا يا نودي
بعد طول غياب رجعت تاني لبلوجر
بصي يل ندى أنا بشوف أن السلطة هي نتيجة لشعب فاسد مستسلم !! و ده عادة مش دائماً لأن الشعب الحقيقي مش حسيسب حاكم ظالم يحكمه ..لأنه مؤمن بمثل عليا ..مؤمن بالله مؤمن بالتضحية!!! لكن الناس عندنا بجد تعبانه ...و بجد محتاجة أن حد يطبطب عليها ..أمل إيه اللي بيخلي الناس تشرب مثلاً ...و العنترية اللي بتشوفيها في الشوارع دي من إيه ؟!! من ناس تايهة و مش لاقية نفسها ..صحيح الفرد عليه مسؤلية و الأسرة ...بس المجتمع كله ...أنا و أنت ....محتاجين كلنا ناخد بإيد بعضنا ...و ساعتها السلطة حتتصلح ..لكن لازم نكافح ...نجاهد نفسنا الأول و بعديها كل حاجة حتيجي ...
مستنية جديدك

elsha3er يقول...

ندا

اية الاخبار اتأخرتى علينا ابقى طمنينا وعايز اشوف حاجة جديدة


احمد الشاعر

Hossam يقول...

سلام عليكم
بجد مضووع نقاش تحفة
انا هكلم على نفسى واوقلك رايى
انا اما بمشى فى الشارع وبشترى حاجة وبخلصها بحط الزبالة بتعتى يا اما فى الشنطة بتعتى يا اما فى جيبى ولانى من محفاظة محترمة المحافظ بتعها حاطط كل ربع متر باسكت زبالة فبضطر انى ارمى زبالتى اما اروح ده اولا.موضوع المحلات والسوبرماركت مش نقدر نعمل فى اى حاجة..بالنسبة للموظفيين لحد دلوقتى مش قبلت حد من النوعية دى ولو دخلت محل اكل بيبقى غالبا فى نسبة للخدمة..ومهما نكلم هنلاقى فى حجات كتير احنا السبب فيها وبالنسبة للتعليم المصرى انا قرررت انى اسيبة من زمان والحمد للله فى مدرس من التعليم الحكومى جه مرة مدرستى قالى كلمة مش قادر انساها اما اكلمت معاه وتناقشنا فى موضوع.قالى انت او اى حد فى التعليم اللى انتوا فيه ده بمقام مدرسة بحلها من التلعيم المصرى وهكذا وهكذا ولكة بيعدى
تحياتى حبيبة قلبى
سلام

dina يقول...

ايه يا ندا دا....هو انتى عايشة معايا فى البيت و انا مش واخدة بالى...انا كنت لسا امبارح بتكلم فى نفس الموضوع دا...بجد و الله العظيم حتى الواحد فى المية دا كفيل انه يغير بلدنا للاحلى لو الواحد فى المية دول مؤمنين بنفسهم و ببلدهم و بحلمهم بيها و ليها و بربنا قبل كل حاجة اللى قال لينا اعملوا و اللى مايرضيهوش اليأس و النوم اللى احنا فيهم دا..ممكن طبعا مصر تتغير...تتغير بأن كل واحد يبدأ بنفسه...يشتغل بجد فى كل حاجة..يحبها و يرضى ربه و ضميره و طبيعى حيرضى بلده بعد كدا و حيغيرها

elsha3er يقول...

كدة انتى بتقلقينا عليكى طمنينا ولو بتعليق

تحياتى

احمد الشاعر

Beram ElMasry يقول...

ندا منير
السلام عليكم ورحمة الله وبركاته
فى يوم ميلاد المصطفى صلى الله عليه وسلم ادعو الله لى ولك بالخير وجميع اهلك ومن احببتم بالسعادة والسرور
لك تحياتى والسلام عليكم ، ولا سلام مع اليهود

ندا منير يقول...

Amgad
..........
ميرسى على تعليقك ، وبالنسبة لمصر كانت اقوى من امريكا امتى
فلو رجعت بخيالك زمان ومن فترة كبيرة كنا حاجة مهمة قوى
بداية من ايام محمد على
واياام جمال عبد الناصر والسادات
فمن رايى اننا فى الفترات دى كلها كنا اقوى من امريكا

ندا منير يقول...

Abd-Alrahman
...............ز
ياريت فعلا تتغير للاحسن
وفعلا كل حاجة بتتغير بس الله اعلم التغير هيبقى للاوحش ولا الاحسن

اشكرك على زيارتك وتعليقك

ندا منير يقول...

Zanooba (Zeinab sab9n)
..............
نورتينى ميرسى قوى على تعليقك
وياريت فعلا كلنا ناخد بايد بعض ونساعد بعض

ندا منير يقول...

elsha3er
.........
سورى قوى على تاخيرى وميرسى جدا على سؤالك
معلش كنت مشغولة جدا فى شغل الجمعية والجرنان وكمان كنت لسة بظبط جدولى وكدة يعنى

ندا منير يقول...

hossam
........
جميل قوى يا حسام تفكيرك دا واسلوبك وياريت فعلا يكون الكل بيعمل زيك كدة
ربنا يكرمك

وميرسى على تعليقك

ندا منير يقول...

dina
........
تمام قوى يا دينا انك تبقى معايا فى كلامى
واكيد لو كل واحد بدا بنفسه هنغير
حاجات كتيرة قوى بس المشكلة مين اللى هيبدا

احمد على نصار يقول...

اولا غيرى اللون بتاع مدونتك فلقع اوى ووحش جدا
ثانيا : مصر مش بتتغير ولا حاتتغير
طول مافيها ناس بالطمع والجشع اللى بنشوفه كل يوم والتانى ربنل يستر
الناس دى نفسى اعرف بيجلها نوم ازاى
وهما كده
كتكوتتنا انتى فين اليومين دول

L0vElYGh0sT14 يقول...

لية الأجابة لا , أنا عندي تفائل كبيررر أن مصر ممكن ترجع زي الأول وأحسن من أمريكا , مش عارف بس أحساسي مخليني مفكر في كدة ومش بفكر كتر في الموضوع دة لان لو فكرت فيه مش هلاقيه حل لوحدي واحتمال متلقيش بوستات جديدة على بلوجي أههههه تحياتي لكي بالورود البنفسجية

العراف يقول...

لو ارتى التغير فلابد ان نغير انفسنا قبل ان نغير من حولنا

مدونة حكومتى ملاك يقول...

نعيب زماننا والعيب فينا
وما لزماننا عيب سوانا

مصر هى مصر

بس احنا الللى تغيرنا الفساد مش فساد مكان ولا زمان لكن فساد أفراد

لو كل واحد اتغير منجواه أكيد مصر هتتغير

ان الله لا يغير ما بقوم حتى يغيروا ما بأنفسهم



تحياتى ,

عمار صبرى .

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
انا مش ح اتكلم في الموضوع ...
انت غبتي فتره طويله ....صح
ورجعتي ...و غبتي تاني ...
ايه الحكايه ...
أخر رد لك كان في 10\3\2009 يعني من 8 أيام ...
تنتظمي معانا ...وبلاش حجج
شغل الصحافه عايز التزام ...
وحمد لله علي سلامتك ...وربنا يرجعك بالسلامه.

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

ندا منير يقول...

احمد على نصار
..........
اشكرك على نصيحتك
وانا غيرت اللون دا لان اللى قبله كان كايب قوى
لكن هبقى اغيره

وميرسى على رايك
وانا معلش كنت مشغولة قوى مكنتش عارفة ادخل
ميرسى على سؤالك

ندا منير يقول...

L0vElYGh0sT14
..........
بالعكس المفروض تقول رايك عادى ومفيش ضرر عليك
بس المهم رايك دا يكون بصورة كويسة وميكنش فيها هجوم على شخص محدد

اشكرك على رايك

ندا منير يقول...

العراف
..
اكيد طبعا التغير لازم يبدا مننا احنا
اشكرك على رايك

ندا منير يقول...

مدونتى حكومتى ملاك
..........
معاك طبعا فى رايك
وحنا اللى عملنا الفساد واحنا اللى نقدر نغيره

اشكرك على رايك

ندا منير يقول...

رئيس التحرير
.........
كنت اتمنى تقولى رايك فى الموضوع

ووالله غيابى مكنش بايدى بجد
دخلت فى امتحانات
بعدها كنت مشغولة فى شغل الجمعيتين
والجرنان
وبعدها دخلت فى الدراسة
كنت لسة بظبط جدولى وكدة
وكنت قلقانة عشان النتيجة
بجد غصبن عنى
ومكنتش مبسوطة وانا بعيدة عن المدونة
ان شاء الله هنتظم تانى

ندا منير يقول...

Beram ElMasry
........
كل سنة وانت طيب
ميرسى

من انا

صورتي
الفيس بوك الخاص بى http://www.facebook.com/nada.mounir.313?ref=tn_tnmn