الثلاثاء، 22 سبتمبر 2009

ارحموا الرجالة شوية بقى ؟؟؟؟؟

ارحموا الرجالة شوية بقى
.......
هم مظلومين ، مبقوش زى زمان محدش بقى بيدافع عنهم ، جيه اللى شغلهم عنهم ، هم الرجالة اتظلموا كتير ولازم نديهم حقهم شوية ، قلنا عايزين المساواة وخدنا المساواة ، قلنا لازم نبقى زيهم وبقينا زيهم واحسن كمان ، ليه بقى نمشى ورا كلام امريكا بان المراة مهضوم حقها ولازم تاخد حقوقها كاملة ،، طب محنا واخدينها كاملة وبزيادة كمان ، ومش ناقصنا حاجة خالص ، امريكا بتلعب بعقولنا عايزة تشغلنا عن حاجات اساسية فى مجتمعنا وتشغلنا بمقولة حقوق المراة حقول المراة ، هو فين دا بقى المراة المظلومة ؟؟ حرية تعليم وخدناها ، حرية شغل فى كل المجالات وخدناها ، حرية الانتخابات والترشيح وخدناها ، حرية الزواج وخدناها ، حتى بعد ما الستات تتجوز بتخلى ازواجهم يشاركوهم فى شغل البيت وتربية الاطفال ، يبقى فى ايه بقى كل يومين تطلع واحدة تقول حرية المراة ولازم ناخد حريتنا ، كلمة بقت كل طفلة وبنت ومراة بترددها ، طب ليه ، مش بقول امريكا بتلعب بعقولنا ، بجد عايزة احنا ناقصنا ايه عشان كل شوية نقول كدة ؟؟
انا مش ضد الستات لانى واحدة منهم ومش كدة وبس وبؤمن جدا بضرورة ان يكون للمراة حياتها المستقلة وان تثبت ذاتها وبصر على كدة ، بس احنا فعلا واخدين كل حقوقنا يبقى المفروض نعترف بكدة مش اقول لازم الحرية والمساواة

عايزة اعرف رايكم بجد ليه الستات بتقول كدة ؟؟؟

هناك 29 تعليقًا:

الازهرى يقول...

تعرفى فى مدونة غلطة مطبعيه كنت قابلت صاحبتها فى حفلة توقيع انا انثى وكان فى احدى الكاتبات قالت شوية الكلام ده عن المرأة المهضوم حقها
فما كان منها الا ان قالت انها ومع انها من منطقه شعبيه يعنى المفروض الأكثر جهلا بحقوقها فهى تنال حقها فى المنزل والشارع والمدرسه والأن الكليه دون نقص عن أى من اخوتها أو زملائها

المشكله هى ان الكل يفضل أن يجلس إلى الورق الذى يوجد به احصائيات غالبا غير دقيقه بالمره ويجلس إلى الكتب ليرى النظريات ويريد أن يطبقها دون تحرى للحقائق ودون ان يرى ما يريده المجتمع حقا من متطلبات
انسياقا وراء افكار باليه ذهب وقتها

تحياتى دوما

غير معرف يقول...

واللهى يا ندا انا معاكى اننا اخدنا حقوقنا
بس اكيد الستات الى بيقولو كده
فى حاجات فى حياتى رجالتهم منعينهم عنها
او
بيهزئوهم
بيضربوهم
بيشتموهم
بيعاملوهم بسلوك غير حضارى
فبيقولو كده
بس يعنى
انما الحمدلله
اعتقد انى واخده حقوقى كويس كبنت مسلمه وفى بيت باباها :D:D
بس يعنى
وخده حريتى تمام اوى فى حدود الدين
الحمدلله
:)
موضوع جميل
نيره

غير معرف يقول...

بس وكمان كل واحد ليه دماغه
يعنى فى ناس عندها كلام الغرب ده شىء مسلم بيه
وكمان البنات بأه الى فى الشارع دلوقتى ولبسين مش لابسين زى الغرب

دول بصراحه هما الى مضيعين حقوقهم
لانهم بيجبروا الولاد انهم ياخدو من حقهم فى الاحترام وهى ماشيه فى الشارع
لانها اساسا مش محترمه نفسها
وماشيه تبع نظريه تحرير المراه
وكمان الى هى بتداريه يبأه مش عايزه حد يشوفه
والى هى مبيناه
من حق الناس انها تشوفه
وتعلق عليه
وهى بتشوف ان التعليق انتقاص من حقها
وعلى كل
الى واخدين حقهم بجد هما الملتزمين بجد بحقوق دينهم علىهم ومجحتمعهم ومحترمين نفسهم
والاخرين
بس فعلا فى ناس بردو مش واخدين حقوقهم خالص
سواء رجاله او ستات
بس
:)
نيره

شاب فقرى يقول...

والله ما عارف

بس مسيرى هعرف
ولما اعرف هفتكر واجى اقولك تانى :)

كل سنة وانتى طيبة

وعاجبنى موقفك

لانى لما بقول زيك كدا الناس بتقول عليه متخلف

لما بقول ان الست مش ناقصها اى حقوق تانى

لو فى حقوق جديدة ظهرت تبقى تاخد فيها

وكل سنة وانتى طيبة يا ندا

شاب فقرى

إبن مصر يقول...

السلام عليكم

بعد ما اقولك كل سنه وانتى طيبه
لازم اشكرك على وقفتك جنبا روحى يا شيخه الله يسترك:)


هعمل ايه اصل الدنيا كله بقت علينا
انا بس نفسى فى المساواه احنا اللى بقينا بنطالب بيها

وخصوصا فى قسم الشرطه
الواحد لو داخل يعمل فى واحده بلاغ يقف زى ال...... ولو واحده اللى داخله تشرف قهوه او شاى او لمون علشان اعصابها
عموما لازم نشكرك يا ست الكل :)

mohamed ghalia يقول...

عشان زى مقولتى فى مجموعة افكار علمانية عايزة حاجات أوفر
فمصرة تاخدها
والله الرجالة الى شكلهم هيطالبوا بحققهم

romansy يقول...

الله عليكى
تعرفى فعلا الستات واخدين حقهم تالت ومتلت فى الزمن دا
بقم هما اللى الاعلام تلقيهم متفوقين علشان حاجات كتير قوى
احنا منقولش الستات متشتغلش
بس لو فيه داعى للشغل
تعرفى ايه احد اسباب العنوسه
شغل الستات
زمان لما كان الراجل هو اللى بيشتغل وكل اللى حواليه فى الشغل رجاله بيحب يغير ويدور على شئ جديد
يحس بيه
دلوقتى بقهم فى البيت فى الشارع فى البوتاجاز
بقم سواقين ماذونين شيفات جيبات
كل حاجه يبقى بقى
الراجل اللى مش لاقى شغل والبنت اللى بشتغل وهى مش محتاجه بقولها حرااااااااااام

دكـــــتور جدا يقول...

الستات بتقول كدة يا إما
* مش فاهمة حاجة وبتردد زي البغباغانات
* يا إما دي افكار علمانية منظمة هدفها فعلا تدمير المجتمع بداعيا شكلهاحلو
........................
وبعدين حقوق ايه اللي عايزينها دي
الحقوق معروفة ف دينا ومفيش خلاف عليها
واللي هيخرج برة كدة هينتهك حرمة الدين
.....................
معلش صدعتكوا بكلامي التقيل
.........................
شكرا لزيارة مدونتي
تحياتي

micheal يقول...

هههههههه..يعني من المرات القليلة اللي بسمع بنت بتتكلم فيها كده بصراحة بس متفهم وجهة نظرك
عن نفسي شايف ان لسه البنات مظلومين في حاجات كتيرة في مجتمعنا اللي لا يزال مسيطر عليه الفكر الذكوري في أمور كتيرة بس ده ميمنعش أن فيه حاجات تانية بدأت البنت تأخد فرصها فيها بس لسه بدري علي حرية المرأة الكاملة في مجتمعاتنا
تحياتي

the giving river يقول...

معلش والله ياجميل سامحينى عشان مبعلقش بقالى كتير بس والله كنت تعبان والله جامد
متزعليش منى ومستنى تعليقك على البوست الجديد بتاعى اوك
تحياتى
محمد

ندا منير يقول...

الازهرى
......
دا فعلا صحيح ودى مشكلة تفكير كبرنا واتربينا عليه خلاص الاغلب بقى ماشى كدة

ميرسى

ندا منير يقول...

غير معرف
.....

نيرة
.....

تمام كلامك يا قمر وفى ستات مظلومة فعلا بس انا كنت بقول فى الموضوع انك ممكن تلاقى واحدة واخدة كل حقوقها وبرده بتقول حقوق المراة
فعشان كدة كنت بسال ليه الناس بتقول كدة

ندا منير يقول...

شاب فقرى
......
بلدنا ابسط حاجة يقولها على اى كلام مش عاجبهم دا متخلف ومييدوش نفسم فرصة يفهموا دا ليه اتقال او حتى يصلحوا من اللى قدامهم ويقنعوه هى دى مصر

ميرسى لرايك

ندا منير يقول...

ابن مصر
.......

وانت طيب ميرسى ليك

انا على فكرة قابلت ناس كتيرة قوى رجالة وشباب كلهم بيقولوا كدة احنا اللى بقينا مظلومين ومهضوم حقنا
ههههههههه

موضوع القسم دا صح
انا جربته
ههههههه

ندا منير يقول...

mohamed ghalia
......

تمام كلامك اى حاجة المشكلة بتاثر على عقول المصريين بسهولة جدا ومن غير ما نحس

ميرسى لتعليقك

ندا منير يقول...

romansy
.......
ههههههههه
دا انت شايل مننا قوى

بس مش دى اسباب العنوسة اسبابها بجد ان عدد االبنات اكتر ودى حقيقة ومن علامات الساعة وكمان الظروف المادية بالنسبة للراجل

ندا منير يقول...

ضكتور جدا
.....
تمام ومعاك فى كلامك

ندا منير يقول...

micheal
......
طب كنت اتمنى انى اعرف منك ايه الحقوق اللى الست مظلومة فيها
وبالعكس دلوقتى انا شايفة ان التفكير السائد هو تفكير نسائى مش ذكورى

وميرسى جدا لرايك

ندا منير يقول...

the giving river
.......
لالا ازعل ليه

والف سلامة

الرخمة يقول...

قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم

و مش هقول سلاااام
رخامه بقى هه

قهوة الرخمين
:D

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
كل عام و انتم بخير ...
معكِ كل الحق ...
فالرجال في حاجه لأمين قاسم
للدفاع عن حقوقهم المهضومه .

ندا منير يقول...

الرخمة
.....
ماشى يا رخمة
ههههههههه

هبقى ازوركم اكيد

نورتى

ندا منير يقول...

رئيس التحرير
......
الناس كلها محتاجة لواحد يظبط عقولهم ويعلمهم ازاى مينساقوش ورا اى كلام يتقال

Beram ElMasry يقول...

أبنتي العزيزة الغالية ندا منير
وأنت في صحة وسلامة وجعلنا وأياك ممن أستيقظت همته وممن يشارك في نشر الوعي بين الغافلين من الأصدقاء وجعلك لأهلك ووطنك خيرا وحفظك من كل مكروه مع خالص تحياتي والسلام ولا سلام مع قتلة الأنبياء والأطفال بني إسرائيل .

موناليزا يقول...

متفقة معاكِ
ولو علمن الاسلام جيداً لعرفن ان المرأة واخدة حقها منذ بدء الخليقة

غير معرف يقول...

فعلا المرأة واخدة حقها كامل ده غير الخلع كمان يعنى ما بقاش الراجل هو اللى بيتحكم فى مسار حياة الزوجة
بس احنا دايما بنمشى ورا امريكا علشان ما يقولوش ان احنا متخلفين؟
تحياتى ليكى يا قمر
إسراء

ندا منير يقول...

Beram ElMasry
.....
الله امين ميرسى جدا

ندا منير يقول...

موناليزا
...
صح كلامك جدا معاكى فيه يا قمر

شكرا لتعليقك

ندا منير يقول...

غير معرف
......
اسراء

ازيك يا قمر وحشاااااااانى مووووووت

فعلا يا قمر الراجل دلوقتى مبقاش تحكمه فى الست زى زمان بقت واخده حقها تالت ومتلت ههههههههههههههه

هانت هشوووووفك بقى

صحراء تضيع فيها أجمل معانى الحياة

اتعلم شعور من يسير وسط صحراء جرداء يبحث عن من يروى عطشه، يسير اميال طويلة بحثاً عن ظل شجرة، كي يستريح قليلاَ ليستكمل مسيرته التي خُلق من أ...