الأربعاء، 23 يوليو 2008

الحقيبة الحقيبة يالا نعمل الحقيبة

الحكومة المصرية مهنية الشعب المصرى وتحرص دائما على سعادة الشعب المصرى وتلبية جميع مطالبهم ، لا ومش كدة وبس دى كمان بتحرص على مصلحة الشعب وتوفير الأمن والامان له والدليل على كدة حقيبة الإسعافات الاولية اللى الحكومة عايزة كل واحد معاه سيارة تكون معاه واللى مش هتكون معاه هياخد غرامة ، شوفتوا بقى ان الحكومة خايفة على مصلحتنا ، وبكدة لو اى حد جراله اى حاجة يلاقى حاجة تسعفه فى حقيبة الاسعافات الاولية لانها مش حقيبة عادية دى حقيبة جامدة وليها مواصفات خاصة كانك داخل تعمل عملية يعنى اى حاجة هتحتاجها لاى اصابة هتلاقيها موجودة في الحقيبة دى
اظن بقى محدش يقدر يتكلم ...............
والحكومة عملت كل حاجة للشعب وفاضل بس الحقيبة هى دى اللى هتحل كل الازامات ، يمكن تكون هى اللى هتحل كل مشاكلنا او هتكون هى البداية لحل المشاكل هنخلى عندنا امل ، ويمكن هى اللى تحل لينا مشكلة رغيف العيش اللى ضيعت معنى الانسانية الى هى ابسط حقوقنا ، وضيعت كرامة الشعب بسبب سوء المعاملة التى يتعرض لها الشعب
من اصحاب افران العيش ومش كدة وبس دا اى حد دلوقتى يروح يشترى عيش يقف بالساعات عشان يعرف يشترى كام رغيف يقدر يعيش بيهم يومين او تلاتة مش اكتر من كدة وبعد كل المجهود دا بيبقى عيش غير صالح ابدا للاستخدام ،
بس استنوا بقى حقيبة الاسعافات الاولية هى اللى هتحل لينا المشكلة دى ومش المشكلة دى وبس دى كمان هتحل لينا مشكلة البنزين اللى بيخلى الناس تقف طوابير عشان يأخذوا
بنزين لسياراتهم وطبعا دا بنزين 80 والناس بدوا يلجاوا اليه بسبب ارتفاع سعر بنزين 90 والفرق بينهم 95 قرش ودا طبعا بيفرق جدا لأن المرتبات منخفضة جدا يعنى دلوقتى اى فرد مرتبه منخفض ولديه سيارة وياخذ بنزين 90 اللى هو ب 175 قرش فجاة هيلاقى مرتبه كله ضاع فى البنزين ، فماذا يفعل الشعب رضى بالهم والهم مش راضى بيه ، رضى بهم الحكومة والحكومة مصرة على زيادة الهم به ، يعنى من الآخر حياتنا كلها هتتحول لطوابير اولها طوابير العيش وتانى حاجة طوابير البنزين ، ومش عارفين هنقف على طوابير ايه تانى ؟؟؟؟؟؟؟؟؟؟ بس برده عشان منظلمش الحكومة هى خلاص اعلنت ان بنزين 80 هيبقى متوفر ومش هيبقى عليه ضغط وكمان سعره مش هيعلى ايه بقى فى كرم اكتر من كدة
بس احنا هنفضل عندنا امل ان الحقيبة هتحل المشاكل دى ، ويمكن كمان تحل مشاكل المزلقانات اللى خاصة بالقطارات اللى سببها بيحدث حوادث عديدة جدا يموت فيها اشخاص لا حصر لهم وآخرهم حادثة مطروح وعدد كبير جدا مات فيها ، ويمكن كمان تحل مشكلة ارتفاع الاسعار سواء اسعار السكن او الطعام او العلاج ومشكلة خفض المرتبات ومشكلة الفقر و .... و...... و.......
مشاكل كتير جدا حوالينا نتمنى انها تتحل ، ويمكن الحكومة لما تفضى من موضوع حقيبة الاسعافات الاولية تفضى لحل مشاكلنا ، هى بس الايام اللى فاتت كانت مشغولة فى ترتيب الحقيبة دى ونظامها هيكون ايه عشان بس لو حد جراله حاجة فى الطريق يقدر يسعف نفسه
بس اكيد هتحل كل مشاكلنا اللى بتواجهنا ، لانها طالما مهتمة قوى بعمل حقيبة الاسعافات يعنى بتخاف علينا وطالما بتخاف علينا يبقى هتحل كل مشاكلنا.................
يالا احنا بقى ندعى للحكومة اللى مخلية بالها مننا ونروح نعمل حقيبة الاسعافات بسرعة عشان منخدش غرامة وعشان لما الحكومة تلاقينا كلنا عملناها تفضى بقى عشان تحل مشاكلنا التانية ..................................
ونتمنى الآن ان ننتهى سريعا من عمل حقيبة الاسعافات الاولية
الحقيبة الحقيبة يالا نعمل الحقيبة ......................
ندا منير
17 سنة
العاشر من رمضان
Nada_mounir_attia@hotmail.com

هناك 6 تعليقات:

خالد كامل يقول...

طب و الله كويس
يعنى احنا طلنعنا ظالمينهم
احنا أسفين يا حكومة
حقك علينا يا حكومة
و لسة الواحد كل ما يعيش كل ما هيشوف
سلام

ندا منير يقول...

اشكرك على تعليقك
وطبعا كلنا ظالمين الحكومة !!!!!!!!!!!!!!

مواطن مصرى نايم يقول...

لا حكاية البنزين ال 80 دى خلاص حيتلغى فى حدود 3 سنين
لان العربيات اللى بتستخدم ال 80 حيتم عزلها من العمل زى التاكسى و ما شابه ذلك
و حيغيروها بعربيات جديده
و ادوا فرصة 3 سنين لمالكى هذة العربيات
يعنى مفيش 80 خلاص
و مفيش امل كمان
و الحكومة هى الحكومة
يعنى واحد مصمم يمشى غلط و برضوا مش مقتنع انه غلط
يبقى اكيد احنا اللى غلط
تحياتى
اسلام

ندا منير يقول...

بشكرك على دخولك مدونتى
وبشكرك برده على المعلومة اللى قلتها
بس عايزة اقولك ان احنا مش غلط الحكومة هى اللى غلط وهى اللى مش راحمة الشعب لكن الشعب مش غلط

إنسان يقول...

era
الموضوع جامد بس انا شايفة انة مهما كانت الحاجات الى هما طالبينها زيادة عن اللزوم فهى مهمة

ندا منير يقول...

اهلا بيكى يا ايرة
بصى انا مبقولش ان الحقيبة دى مش مهمة انا بس بقول ان الحكومة بتهتم بحاجات مش مهمة اوى للشعب وسايبة حاجات اهم بكتير

صحراء تضيع فيها أجمل معانى الحياة

اتعلم شعور من يسير وسط صحراء جرداء يبحث عن من يروى عطشه، يسير اميال طويلة بحثاً عن ظل شجرة، كي يستريح قليلاَ ليستكمل مسيرته التي خُلق من أ...